“沙”同“河”
白 话广州
广州唔少地名好有意思，有时即便系土生土长嘅广州人，一个地名都未必可以第一时间反应佢喺边度。譬如“棠下”，要问清楚系天河嘅棠下定白云嘅棠下；“大塘”，除咗荔湾之外，其他十个区都有“大塘”。
有趣嘅系，广州东边有个“沙河”，西边就有个“河沙”。两个地名掉转写，骤眼睇落都好容易搞错。沙河呢个地方，其实好多人搞唔清佢到底属于边个区，好似关越秀事，又好似同白云天河都有啲关系。不过，讲起呢个地区一般人都唔会搞错，大名鼎鼎嘅服装商圈，仲有出名嘅沙河粉。而西边嘅河沙系大坦沙岛上边嘅一个村，上世纪90年代后期，唔少来穗人员响呢度落脚，呢度成为一个外来人口聚集嘅城中村。
呢两个地方，同“河”同“沙”都有关系。沙河，因为一条水中带沙嘅河流经过，百几年前叫做沙河埔；而河沙则因为地处珠江之上嘅大坦沙岛得名——广州人中意将珠江上边嘅岛称为“沙”，呢啲岛屿由河沙冲积而成，最出名嘅系大沙头、二沙岛、海心沙、沙面等等。
讲起呢两个地方，广州人可能摆脱唔到对佢哋嘅固有印象。不过佢哋依家都有新规划，几年之后可能会令大家刮目相看哦。
◎李月婷 媒体人
新闻推荐