白撞雨与白撞

白话广州

上周四中午，原本阳光灿烂嘅天空突然间噼里啪啦落起雨。楼上有一师奶大声对住花园嗌：仔呀，落白撞雨喇，灒坏人嘎，快啲返上楼啦。

广州呢种岭南地区，喺农历四五月份经常会骤晴骤雨，甚至出住太阳落雨，呢种雨坊间叫白撞雨。

白撞雨系一种传统叫法，喺古代就有。明末清初番禺学者屈大均嘅《广东新语》就有记载：“凡天晴暴雨忽作，雨不避日，日不避雨，点大而疎，是曰白撞雨……”大概系话雨同太阳互不相让，对撞嘅意思吧。

至于楼上师奶讲嘅“灒坏人”，系借用咗炒菜嘅原理嚟说明白撞雨嘅危害。

炒菜时将个镬烧到红晒，然后洒啲水落去，粤语叫“灒水”。

当烈日当空将个地面晒到兴时，突然落雨，冷热相撞，地面就会散发热气，如果人吸得太多，就好易感冒发烧，即灒坏人。所以坊间仲有一句歇后语叫做：白撞雨——(灒)赞坏人。意思系表扬一个人之后，反而令佢骄傲犯错。

粤语仲有一个同白撞雨相似嘅词组叫白撞，属贬义词，同天气冇乜关系，意思系指冒充同人家好熟或趁对方唔知实情，去偷呃拐骗或谋取私利嘅行为。

反正，日常生活中，白撞嘅雨要避，白撞嘅人要防。

◎阿六 律师

新闻推荐

番禺一3岁男童悬空卡在3楼防盗网 点赞！快递小哥徒手爬楼救人

快递小哥爬上二楼救人。视频截图信息时报讯（记者陈子垤）25日下午，番禺市桥的一居民楼3楼出现惊魂一幕，一名3岁多小男孩从...