行当同路名
白话广州
寻日讲咗“路”同“街”嘅区别，今日再讲下街巷名嘅趣闻。
广州自古以来商业气息浓厚，点解？睇下呢啲用行业嚟命名嘅街巷就知道喇。老城区越华路上边有条“旧仓巷”，呢度嘅“仓”系指宋代广州嘅“盐仓”。因为呢个盐仓而得名嘅，仲有大家都知道嘅“仓边路”。“卖麻街”，喺一德中路嘅北边，从宋代开始，呢度就系织网、卖麻嘅集市。越秀山下有条“豆腐寮”，当时喺呢度居住嘅居民用山下边嘅井水做豆腐，所以有个咁嘅地名。“扁担巷”喺惠福西南边，系扁担集市。同佢相似嘅有附近嘅“竹嵩巷”，同样喺惠福西，系专卖竹篙嘅商铺。仲有塘鱼栏大街、蚬栏街、造币街等等，睇到呢啲街巷名，就可以估到呢个地方以前系经营咩行当嘅。
广州话比较得意，有时路名都可以用嚟做歇后语，包括呢啲同行业有关嘅街名。比如“盲公过光雅里——冇眼睇”。据讲“光雅里”以前叫“缸瓦里”，系清代嘅缸瓦集市，后来因为觉得呢个名唔好听，改叫“光雅”。同样嘅仲有“天成路——靠纸（指）”，天成路以前印刷业兴旺，系四乡著名嘅印刷包装一条街，佢附近嘅纸行路就系因为呢个行业而得名。
◎李月婷 媒体人
新闻推荐