“路”同“街”

白话广州

上次讲咗下广州嘅旧路名，今日嚟讲下广州嘅“路”同“街”。

按照今日嘅城市布局，大家都知道，“路”一定系大过“街”嘅。不过大家可能唔知，喺百几年前，广州系冇“路”嘅。彼时广州城范围唔大，大概就系依家老越秀区嘅范围。喺呢个老城区里边，多数都系只能供人步行或者坐轿嘅“街”“里”“坊”，可以行马或者马车嘅街道比较少。广州最早嘅马路，系川龙口至西濠口嘅长堤同埋东较场到沙河嘅东沙马路。

喺《现代汉语词典》里边，“路”系指马路，即“城市或近郊供马车行走的宽阔平坦的道路”。由此可以睇出，“路”有两个特点，其一系“路”在城外，其二系“路”又大又长。因为马路修建嘅时候就系比“街”更长更阔，所以后来喺广州修建嘅道路，凡系有呢个特点嘅都一律称为“马路”。

“马路”系行马嘅，后来广州城里边汽车越来越多，于是路名就去“马”留“路”。当然，依家依然有“马路”，好似长堤大马路、八旗二马路、建设大马路等等。后来出现嘅“道”就比“路”更大更长了，好似中山大道、广州大道等等。所以，喺广州，系“道”大过“路”，“路”又大过“街”。呢个算系广州特色喇。

◎李月婷 媒体人

新闻推荐

礼赞共和国奋进新时代 越秀8000多名演员国庆假期7天在海珠广场表演

越秀区有近200支文艺团队奉献了14场文艺演出。广州日报讯（全媒体记者廖靖文通讯员周小莉摄影报道）“我和我的祖国，一刻...