百年棠溪站
白话广州
今日讲讲棠溪，因为佢近排都几“热”。
传统上嘅棠溪系叫棠溪村，位于广州城区西北郊、广花公路两侧，属白云区新市镇。因为南宋嗰时有一位叫梁棠溪嘅名人喺当地定居而得名。
讲起棠溪，好多人自自然将佢同城中村、握手楼、工厂区划上等号，好似当地冇乜好嘢可以摆上台嚟威下咁，但事实上，棠溪仲系有一样威水嘢，讲嘅系棠溪火车站。
喺民国期间，当时嘅政府打算喺广州边皮揾个地方起一座火车站，最后睇中咗位于西北郊嘅棠溪村。1916年一座新火车站喺棠溪村西边起好，因为地处西北，所以当时个名叫做西联火车站，成为当时广州一个客运重要大站。到咗1937年，西联站又成咗粤汉铁路同广九铁路嘅联轨站，改名叫广州北火车站，亦即系讲，最早嘅广州北站系喺棠溪嘅。
后嚟因城市发展需要，广州北站先后易址白云区江高镇同花都区新华街，而棠溪呢个最早嘅广州北站喺1989年就改名叫做棠溪火车站，运力大幅缩细，只系作货运站唔再运客。
棠溪火车站从起好到宜家，足足有百几年历史。百年老站，广州真系冇几多个嘎。
本周二，广州有关部门公布规划，今年9月1日将喺棠溪开工建一个大型火车站，起好后就引入京广、广湛高铁。百年棠溪站将再次焕发生机。
◎阿六 律师
新闻推荐
广州日报讯（全媒体记者杜娟）广州机场第二高速预计2020年全线通车，未来将直通白云机场至T2航站楼。昨日，机场第二高速至T2航站...