大修鹤洞桥
白话广州
前几日有新闻话，鹤洞大桥出年要大修，工期两年。的确，鹤洞大桥从开通到今日，已经有成廿年咁长，系时候要“抖一抖”喇。
记得鹤洞大桥刚刚开通嘅时候，过桥系要俾钱嘅。以前从河南过芳村，无论系开车定系坐巴士，过江多数都系选择海珠桥。记得有一次喺河南市二宫过黄大仙，坐车就坐咗成个钟，真系有种“山长水远”嘅感觉。鹤洞大桥通车之后，专登同朋友揸摩托车开过大桥，桥上一路畅通，十几分钟就过到芳村。冇几耐，巴士都有线路行鹤洞大桥往返河南芳村，有机会我都会坐一坐——可以从唔同角度睇珠江，远望广船都觉得佢好有派头。
至于嗰啲住喺附近嘅街坊，以前出行就靠轮渡。河南呢边嘅街坊会去白蚬壳码头坐轮渡过鹤洞大桥旁边嘅白鹤洞码头。呢啲渡轮可以搭人亦都可以搭单车，单人一次五毫，多一部单车再加五毫。喺冇鹤洞桥兼冇地铁嘅年代，呢种系河南芳村两地街坊最快捷最实惠嘅过江方式。呢度再同大家科普下，白蚬壳码头嘅官方名叫做“太古仓码头”。
鹤洞大桥要大修，好多街坊都担心出行问题。其实唔使咁忧心嘅，当年冇呢条桥，大家唔系一样“过海”？踏正时间坐渡轮，唔怕塞车唔怕迟到。当然，轮渡时间加密就更加好喇。再唔系，仲有地铁同共享单车可以代步。◎李月婷 媒体人
新闻推荐
广州日报讯（全媒体记者张喆）由广州市体育局主办，广州市足球协会承办，各区业余体校梯队参加的2019年广州市青少年足球锦标赛于...