识“换妆”嘅花
白话广州
俗话讲，一样米养百样人，广州作为花城，亦可以话“一个城养百样花”，并且每样都有自己嘅特点。譬如最近开嘅木芙蓉，一日之间会变三种颜色，就好似玩变脸，又好似贪靓换妆嘅小姑娘咁。
新闻话，呢排正系木芙蓉盛开嘅时间。广州好多地方都可以睇到呢种花，包括流花湖公园、晓港公园、华南植物园、海珠涌等。呢种花，长得有啲似牡丹，又似好多蝴蝶嘅翅膀，一起摆成圆盘状咁。最得意嘅系，佢仲识得变色，一日可以变三下，颜色由浅变深。晨早雪白，到咗中午就换成浅红色，挨晚又变做深红色。原来，佢嘅花瓣含有一种叫花青素嘅嘢，太阳光照射下，花青素就会令成朵花换上另一种颜色。佢又恍如饮醉咗美酒咁，阳光一照就红卜卜，所以街坊又帮佢起咗个好诗意嘅花名，叫“三醉芙蓉”。
话时话，其实只要留意，你会发现，身边仲有好多花使得“变”。譬如广州常见嘅四叶草花，日头会开得十分灿烂，到咗太阳落山，佢哋就将花瓣“收埋”，就好似一个怕羞嘅大姑娘咁。点解呢？书本就话，咁样可以保护嘅花朵，包括将露水隔开，保持干燥，方便蜜蜂授粉，仲可以唔俾夜晚嘅飞蛾埋来。我喺郊区仲见到有啲花草，到咗挨晚，连叶都会收起身。睇来，呢啲花，唔单只贪靓，仲好醒目。
◎闻歌 媒体人
新闻推荐
广州日报讯（全媒体记者曾卫康）中大布市道路通畅了。昨日，记者从广州市海珠区有关部门获悉，海珠区通过深化综合治理、推动升级...