随时随地听古仔
白话广州
前嗰排，我帮屋企嗰位老人家装咗个可以听古仔嘅软件。每日中午食完饭，佢就多咗个消遣。
谂返读小学嗰阵，中午返屋企食饭，踏正十二点就即刻开收音机。嗰个时候听嘅都系名家，林兆明、张悦楷；《水浒传》《杨家将》都系喺嗰时听返来嘅。依家系“手机送饭”，以前系“古仔送饭”。听到紧要关头，讲古佬突然一句“欲知后事如何，且听下回分解”，个心即时乸住乸住，然后开始“脑补”下一段古仔嘅情节。
可能好多同我同龄嘅街坊都经历过呢一段，以前听古仔冇咁方便，冇话想几时听就有得听。电台一日播两次，中午更新晚黑重播。无论做咩都好，总要就啱一个时段听古仔。有时唔过瘾，中午晚黑要听两次。
林兆明同张悦楷系粤语讲古界嘅大师，张悦楷嗰句“前文再续，书接上一回，话说……”听落最亲切，印象最深系佢扮女性角色时嘅音调。历史、武侠系讲古嘅主要题材，不过我记得我仲听过言情小说——琼瑶嘅《彩霞满天》，呢本都系我接触嘅第一本言情小说——都系听古仔引发嘅好奇心。
依家唔知仲有几多人听古仔。前段时间广东粤语语言艺术团成立，一班“讲古佬”话要做“网红”，粤语古仔以后会有专门嘅App。到时要装返一个，多啲俾屋企嘅小朋友听下，学下历史，学下广州话。
◎李月婷 媒体人
新闻推荐
广东建设报讯记者谈健报道：日前，记者了解到，广州市2019年户籍家庭公共租赁住房（下称公租房）共4851套于5月6日起接受符合申请公...