急急脚嘅夏天

信息时报 2019-04-15 01:11

白话广州

前几日气象台宣布，今年广州入夏时间偏早，喺清明节亦就算正式“入夏”，广州家阵已经系名正言顺嘅夏天。不禁谂起，每年冬季广州报纸嘅标题，三番四次话“入冬失败”。睇来，广州嘅冬夏就好似两个性格唔同嘅细路咁，冬天总系拖拖拉拉，而夏天就急急脚赶到。

刚好喺广州入夏过咗几日，北京仲落咗雪，呢点令唔少网友都津津乐道。“热到飞起，我屋企都开咗空调”，唔少街坊都对广州嘅夏天早有准备，一早就准备好风扇、空调等，对付炎热嘅天气。不过奇怪嘅系，唔少街坊屋企嘅棉被，仲未来得及拆去。老人家教落，未食五月棕，寒衣不入笼，即系话端午节前都有可能仲会冻。所以广州人嘅家居，都系短袖与棉衣齐飞，棉被共空调并存，系米好搞笑？

无论“官宣”入夏嘅时间早晚，广州到咗呢段时间，夏天嘅气息确实开始浓郁。譬如，呢段时间，唔少小区或者公共嘅游泳池开始进入开放前嘅清洁工作，过两三周之后就会正式开门迎客，可以俾街坊尽情游水；广州周围嘅游乐景区，玩水嘅项目又准备喺五一节上场，水上嘅乐趣又开始来临。喺菜市场，天热先有嘅通心菜，又开始占领一席之地。商场嘅空调、冷饮、雪糕、蚊香、竹席等，又开始促销热卖。你呢，准备好未？

◎闻歌媒体人

参加活动的妇女高举国旗和标语。信息时报记者陈文杰摄民间艺术家高声歌唱。信息时报记者陈文杰摄信息时报讯（记者...