白云山嘅路

白话广州

新闻话，广州花园最新规划出炉，有8公里嘅“云道”，由中山纪念堂可以直接行上白云山，要做到“青山全入城”。

而家市民行白云山其实都好方便。喺清代之前，白云山距离嗰时嘅广州城区就有十里左右，行到山脚起码都要个半钟。上山啲路梗系冇而家咁靓啦，通常都喺能仁古寺嗰度出发，经半山亭、白云寺、郑仙岩、鸣春谷再上摩星岭。喺清朝嗰阵，白云山就已经系市民经常去游玩嘅好地方。而广州市民行白云山嘅习惯应该可以追溯到宋朝，因为嗰时白云山已有“蒲涧濂泉”入选“羊城八景”。跟住系元代嘅“景泰僧归”同“白云晚望”。

而白云山嘅古道后嚟大多湮灭，一啲出名嘅景点都系剩低遗址，好似云岩寺、双溪寺、景泰寺。喺2004年，白云山嘅工作人员喺探险嗰时，意外发现咗一条北宋年间嘅“翠薇古道”，佢就喺鸣春谷内，“天南第一峰”牌坊下边。条路又窄又斜，因为系石板路，遇到落雨天就会又湿又滑，更加难行。可能系开劈咗新路，令到佢逐渐荒废。

将来有咗新嘅“云道”，市民上山就可以“一路直达”，行山变到好似行到屋企后花园咁方便。到时，相信会有更多市民上山，好似新闻预计咁会翻倍，超过1600万人次。◎阮栩 编辑

新闻推荐

广州举行学校国防教育成果展暨中学国旗护卫队交流展示活动 红旗飘飘 学子展英姿

图为广大附中国旗护卫队走过主席台，接受检阅。信息时报记者陆明杰摄信息时报讯（记者庞泽欣通讯员梁苏建）国旗护...