木棉花开唔再冻？
白话广州
上个星期行喺广州街头，睇到路边好多木棉树（又称红棉）已经开晒，而街上有啲人已经“短打”上阵，因为气温有成20度。睇到呢个情形，我谂起上世80年代嗰首流行曲《红棉》开头嗰句歌词“红棉盛放，天气暖洋洋……”。呢首歌写出咗木棉嘅特点——木棉花开，冬天不再来。点知，到咗今个星期一，广州嘅气温又开始“插水”，一下子降到十几度，街上嘅“短打”唔见晒，听到嘅又系早嗰排嗰种“雪雪声”——冻呀。
木棉花系广州嘅市花，一般喺每年嘅二月底到三月初开花。大部分嘅植物都系先出叶再开花，但木棉就与众不同，佢夏天绿叶成荫，秋天枝叶萧瑟，冬天秃枝寒树，而到咗春天，气温湿暖，就开始开花，讲明春天嚟喇，唔会点冻喇，正所谓春暖花开嘛。所以，民间就有咗“木棉花开，冬天不再来”、“木棉花开无冷日”等讲法，《红棉》呢首歌自然就有咗咁样嘅歌词。
咁宜家木棉花都开晒喇，点解仲咁冻嘅？因为植物嘅开花只讲明季节变化，唔一定讲明天气百分之百唔冻，“木棉花开，冬天不再来”只能讲系一种大概率情况，唔系绝对。广州宜家呢种天气，其实系“倒春寒”，不过，呢种“寒”寒得嚟系有限嘅，温度好少低过两位数，并且持续时间短。唔使几耐，广州就热嘎喇。◎阿六 律师
新闻推荐
卡地亚位于DFS旗下澳门T广场四季名店中精品店，日前重装开幕。新店面积达333平方米，由巴黎著名艺术家兼装潢设计师BrunoMoin...