创新马拉松

白话广州

前两日，花都举办咗一场大型嘅摇滚马拉松赛事。同其他马拉松唔同嘅系，比赛沿途设置咗多个“音乐加油站”，并且喺终点搭起摇滚音乐舞台。

喺目前各地都纷纷举办马拉松嘅背景之下，马拉松+摇滚都算系一种新鲜创意了。其实，广州嘅马拉松比赛，历史上就以“开风气之先”而闻名。呢种西洋玩意，最早喺20世纪初传入，因为可以强身健体增强国民素质，所以1930年由官方正式举办。

相比起现代马拉松赛程长达42公里，广州呢届马拉松只能算系小儿科——从当时中央公园出发，经上下九、西堤、越秀南、东川路，终点返回财厅，全长只有十几公里，好快就跑完了，但喺当时已算系一个创举。

为咗一睹呢项新鲜事物嘅风采，广州街坊有啲企喺沿途或者自家瓦背顶观望，有啲干脆踩单车猛冲猛追，场面相当墟撼。

不过，如果要讲数量最少又瞩目嘅一群人，就要讲到寥寥可数嘅几位女选手啦。当时风气依然保守，女仔抛头露面出来跑步系一件好勇敢嘅事。所以，女选手每到一处，都会引来大量掌声。喺1933年嘅第四届环市赛跑里面，市立十六小学嘅女生谭秀容夺得亚军，同学仲用汽车载住佢一路游行庆祝。大家纷纷用欢呼声表达对呢啲女生嘅敬意。而佢哋嘅勇气同尝试，亦成为咗当年嘅一段佳话。◎梁倩薇 编辑

新闻推荐

购房拟按套内算？专家称不影响总价目前市场报价多按建筑面积单价，专家称政策利大于弊，起码物管费或降

目前市场报价多按建筑面积单价，专家称政策利大于弊，起码物管费或降