白话嘅“圩”
白话广州
过完年，啲超市开始重新摆设货品，恢复平时嘅样子。喺食品区，前阵时一堆堆，红当当，花哩碌嘅年货，好似刘谦玩魔术咁，一下子变走晒。一位老伯同佢夫人一边买嘢，一边倾偈，“过年前呢度仲好逼，家阵冷清咗，真系一节淡三圩”。
广州话“一节淡三圩”，形象咁反映咗节日消费嘅起伏，无论旧时或如今，都毫不例外。旺季淡季，唔少行业都会有。节日前后，需求旺盛，商家抓紧时机落力叫卖。唔好讲超市，就算网上嘅电商，一有节日，哪怕系九唔搭八嘅节，都用来搞促销。
讲返“圩”，如今嘅后生仔女已经好陌生，但对于好多街坊来讲，佢热闹繁华，印象深刻。圩，即系集市，无论城乡都有，每月固定一个或者几个日子，来进行大规模嘅交易买卖。如今，互联网买嘢方便。但喺以前，圩见证咗最繁华嘅线下交易景象。呢个字，使人联想到人山人海嘅场面，琳琅满目嘅商品，叫卖声、讲价声不绝于耳。
时至今日，“圩”已经好少见，但白话里边嘅“圩”，一直存在。圩撼，表示拥挤；圩咁嘈，表示吱吱喳喳，噪音不断；开圩，表示场面混乱。而且，广东仲有好多大大细细嘅地名，都带个“圩”字。呢种浓浓嘅商业记忆，通过语言同地名，得以保存。◎闻歌 媒体人
新闻推荐
第一排（从左至右）：霍崇仪，78岁；谢艳燊，86岁；罗少英，82岁；李静仪，89岁第二排（从左至右）：梁剑华，90岁；沈秀香，84岁；卢焕文，92岁第三排（从左至右...