旧时春运买票

白话广州

春运又到啦。今年，广州火车站启用“刷身份证即可入站”新举措，如果你喺12306上面买咗D或G开头嘅车票，符合条件，就可以“它它条条”行到凭二代身份证入站啦。同时，广州东站今年亦开通咗“支付宝刷码过闸功能”，无须车票同身份证，只要手机出示付款码就可以入站。

广州春运几十年，新举措时不时都会出台，出行条件亦越来越好。上世纪八九十年代，广州外来人口激增，每逢春运，火车站一带嘅墟撼情景令人难忘。就单讲买票，由于当时售票以窗口为主，大家只好逼晒去排队，每个窗口都伸出三四条长龙，由火车站企到去桂花岗。中途，无人够胆去厕所，逼得犀利嘅时候，前后嘅人仲要揽埋一旧，防止其他人占队。

买票唔易，后尾就出现好多代购点，虽然要收手续费，排队嘅人亦好多。但大家只要能够买到票赶到年三十晚团圆，都唔会计较咁多了。所以相当长嘅一段时间，代购点到咗年尾亦会生意兴隆。

随住时代进步，运输部门亦一直努力改善春运购票体验。比如，提早放票，大家唔使逼埋一齐买，因应科技发展打开网络多种买票渠道，喺车站范围布置好多民生设施方便乘客等等。而家春节归家之路，就比以前好行好多了。好多人亦由此感受到呢座城市嘅活力与温度。

◎梁倩薇 媒体人

新闻推荐

资讯 新加坡儿童英语学习系统 登陆中国

新快报讯1月13日，来自新加坡的儿童英语学习系统“ICanRead”登陆中国新闻发布会于广州举行。据悉，该系统由教育心理学家安...