梅花村点解梅花多
白话广州
寒冬腊月，梅花盛开。喺广州赏梅，好多市民第一时间会惗起“萝岗香雪”。但实际上，要拍靓梅花，就近去到中山一路梅花村就达，呢排啱好赶上白梅怒放，每日去影相嘅街坊一批接一批。
梅花村点解会有咁多梅花呢？其实，呢份美景系历代居民共同努力嘅成果。
20世纪初，梅花村所在地本来系一片村野。《辛丑条约》之后，外国一啲宗教团体开始以呢度为基地布道。后尾，大批海外华侨归国发展，喺度置地起屋，带动东山兴起，最终吸引咗当时嘅官僚政客过来起别墅定居。
1932年，主政广东嘅陈济棠亦喺呢处建成公馆。陈济棠一生喜爱梅花，觉得佢无惧严寒，傲骨铮铮，所以喺公馆周围亦广植梅树言志。由此，呢个地方就被称为“梅花村”了。
之后，梅花村居民为咗呢块金漆招牌亦做咗唔少事。比如广州办亚运嘅时候，社区发起“再植梅花”活动，号召居民爱惜梅花，认养梅树，同时仲加种咗百株新树，令到景致更加丰满。后来，社区又于每年1月10号举办梅花文化节，进一步打响名头。于是，呢几年去梅花村赏梅嘅人亦越来越多。
除咗睇花之外，由于梅花村喺历史上具有一定地位，所以亦保留咗陆幼刚公馆、欧阳山故居等历史建筑，都好值得观赏。下个假日，去梅花村享受浮生半日闲，其实都几舒服嘎。
◎梁倩薇 编辑
新闻推荐
信息时报讯（记者陈子垤通讯员陈毅虹汤果）31岁男子李某经过二十几年寒窗苦读，终于从医科大学硕士毕业，还没来得及在医药研究方...