海珠广场地标多

信息时报 2018-12-28 01:33

白话广州

宜家讲到广州著名嘅地标建筑，大家都会谂到赤岗嘅广州塔，或者珠江新城、海心沙、琶洲嗰一带嘅建筑，呢啲都系新嘅“地标”所在地，而传统上嘅广州“地标”喺系边度呢？答案系：最近宣布升级改造嘅海珠广场。

海珠广场嘅地理位置另舍“正”嘅，佢喺正广州中心区嘅中心。1963年同1982年，广州评先“羊城新八景”，其中一景叫“珠海丹心”，呢个“心”就系指以广州解放纪念雕像为中心嘅海珠广场。所以，用个“正”字嚟形容海珠广场系咪好啱呢？

海珠广场有一样系好巴闭嘅，就系佢周围嘅啲建筑，栋栋都有番咁上下份量：东面爱群大厦，1937年开业后，佢嘅“广州第一高楼”嘅称号保持咗整整30年；北面广州宾馆，因楼高27层，被街坊简称做“27层”，佢亦凭呢个高度，喺上世纪六七十年代成为全国高楼中嘅“一哥”；西面缤缤广场，虽然冇“27层”、“爱群”宏伟，但佢系广州最具有标志性意义嘅苏式建筑，上世纪六七十年代呢度曾经系广交会会址，闻名中外；南面系广州第一座跨江桥——海珠桥；中间系嗰座威风凛凛嘅广州解放纪念雕像。

海珠广场呢啲建筑，多年嚟一直都系广州市标志性建筑，而喺一个咁细嘅地方，汇集咗咁多标志性建筑，广州都几难揾到第二个。

◎阿六律师

据羊城晚报消息2018中国海外人才交流大会暨第20届中国留学人员广州科技交流会（以下简称“2018海交会”）于22日闭幕。两...