粤语同粤剧
白话广州
时下好多后生仔都中意传统文化，比如粤剧。有人觉得粤剧无非就系“查笃撑”做大戏，但其实粤剧文化对广州人影响好大，我哋日常讲嘅广州话都有唔少粤剧元素。
点解咁讲？因为粤语里边好多词汇出自粤剧。
最常用嘅“六国大封相”，指人多场面混乱或者情况复杂，呢句说话就系来自粤剧。做错嘢又或者犯禁忌，我哋称之为“撞板”。呢个“板”就系粤曲里边嘅“叮板”，老倌唱错“板”就系“撞板”啰。又譬如“爆棚”，依家大家都知佢系指人山人海场面火爆嘅意思。呢个“棚”又系出自粤剧戏班嘅“戏棚”。睇戏嘅观众太多，将“戏棚”逼到“爆”，所以就有咗“爆棚”嘅讲法。再到我哋成日用嘅“顶栊”，喺广州话里边系“最多”“俾到尽”嘅意思。呢个“栊”又同粤剧有关。以前西关啲戏院只有地下一层堂屋，台下两排座位，中间系过道，入口就喺最外边。呢个入口系个木栊门，两边用圆木做门闸，用来挡住外边嘅人。睇戏嘅人多到要贴住呢个木栊门嘅时候，就系“顶栊”喇。
所以话，广州话里边有好多用语都兜唔开粤剧，甚至“冬前腊鸭”“头崩额裂”“阴阴湿湿”呢啲词语，都同粤剧曲韵有关。有人话，粤语九声，本身就系唱歌。粤语同粤曲，都可算系“你中有我，我中有你”喇。
◎李月婷 媒体人
新闻推荐
致敬新时代奋斗者开栏语迈入新时代，中国成就举世瞩目，逐梦路上，处处是奋斗者的身影。“新时代是奋斗者的时代”，习近平总书记...