消失嘅泡水馆

白话广州

天寒地冻，唔想冲凉，瑟缩之中，不禁惗起广州当年嘅泡水馆。

泡水馆呢个行业，而家年轻一代基本上唔知道了，但喺上世纪六七十年代之前，广州街头巷尾梗有一家，基本上就系用煤来煲水，供街坊打水或者冲凉。如果遇着年三十晚呢啲大日子，来帮衬嘅人会排晒长龙。

而家用惯热水器嘅人，可能想象唔到“泡水馆点解有存在嘅必要”。我听老一辈讲，呢个行当其实出现喺抗日战争胜利之后，一方面广州人返屋企重建家园，另一方面其他地方嘅人亦前来讨生活，一时间，广州人口剧增，生活设施供不应求，好多人嘅屋企连厨房厕所都无。

正因为面向嘅人群经济能力有限，所以泡水馆嘅设施亦十分简陋，虽然有木盆可以浸浴，有铁桶可以淋浴，但一个人用完，店家用个刷刷一下，就面不改色俾下一个人用——咩消毒、烘干程序，当时，无人会讲究嘅。

到咗而家咁冻嘅时候，泡水馆一样人丁兴旺。而且，好多人为咗抵御寒冷感觉，仲会唱粤曲助兴，咩“云寒雨冷，寂寥夜半景色凄清……”真系有咁应景得咁应景。唱曲嘅人自己就暖了，但旁人听到起晒鸡皮，亦无可奈何。

泡水馆嘅生意，一直延续到上世纪七八十年代。改革开放之后，广州人生活改善，泡水馆亦随住好多旧行业一样，逐渐湮没喺时光之中了。

◎周公子 自由职业者

新闻推荐

好家风短视频，你喜欢哪一款？ 2018年“弘扬广州好家风”短视频征选网络投票启动

信息时报讯（记者何小敏通讯员穗纪宣）好家风，代代传！记者昨日从2018年“弘扬广州好家风”主题活动主办方获悉，本届“弘扬广州好...