舞狮要够醒

白话广州

前日，广州友谊剧院上演咗一场精彩嘅民族舞剧，《醒·狮》。现场1200位观众得以抢先大饱眼福。之后，呢部作品仲准备去上海参加中国舞蹈“荷花奖”舞剧评奖展演添。

喺岭南文化中，醒狮系一个重要嘅题材，唔单止经常出现喺街头巷尾嘅大小庆典之中，而且，喺影视、出版等文化产品中亦多有提及。比如大家都好熟悉嘅黄飞鸿电影《狮王争霸》，就系以醒狮大赛为线索，道出咗嗰个时代中国人嘅民族精神以及气节，成为昔日港片嘅一部经典之作。

醒狮嘅文化魅力，之所以多年长盛不衰，最关键嘅一点就在于“醒”字。醒，喺广府语系中具有丰富嘅含义，比如话，醒，可以代表“有精神，有力量”。舞狮要舞得好，狮子嘅眼神就一定要醒，要左顾右盼，伶俐传神。此外，狮子嘅身形步法亦一定要醒，爬高采青要干脆利落，挥洒自如。咁样嘅狮子，先至算系舞得够“生”，能够体现旺盛嘅生命力，以及一派昂扬争先、不甘人后嘅精神。

醒，亦可以代表“醒悟、醒觉”，喺迷局之中要打醒精神，喺困顿之中要掌握先机，咁样先可以独立潮头、出奇制胜。一个“醒”字，诠释咗岭南品格之中灵动与敏锐嘅部分。亦因此，醒狮呢项非物质文化遗产传承至今，亦早已成为岭南文化嘅一张名片啦。

◎周公子

新闻推荐

全国将试点开展无痛分娩，广州多家医院早已开展，知情专家透露： 无痛分娩有望纳入医保

□本版统筹信息时报记者张秀丽本版撰文信息时报记者张秀丽廖温勃通讯员易灵敏周密周晋安戴安希李玉红刘元铃潘英媛“生过...