晏公街上话捉蛇
白话广州
细个嘅时候曾经得过一场病，去咗好几次医院都睇唔掂。当时听爸爸妈妈商量，要带我去“晏公街”睇下。点解大医院睇唔好嘅病，去晏公街就有得医呢？后来我先知道，当年呢条街有间好出名嘅医院——越秀区中医杂病医院，嗰时但凡有咩疑难杂症，大家都会去呢度问一问。
晏公街，一条以“晏公”为名嘅街巷，就喺人民南路附近。当年嘅中医杂病医院，依家已经变咗社区卫生院。其实，“晏公街”唔系广州嘅“特产”，全国各地都有。先同大家介绍下“晏公”呢个人。晏公系神话传说里边嘅一位神仙，据讲曾经救过明太祖朱元璋。后来，朱元璋封晏公为“都督大元帅”，通令“天下奉命祭礼”，所以全国好多地方都修庙供奉。广州亦起好一座晏公庙，之后就有咗“晏公街”。
好多人知道晏公街，系因为呢度嘅中医杂病医院。最近呢间医院嘅一个项目就被列为广州市第六批省级非遗申报，佢就系“捉蛇”喇。所谓嘅“捉蛇”，就系医治带状疱疹。“生蛇”好痛，系民间所讲嘅一种疑难杂症。呢间医院嘅医生喺呢方面有绝技，用针刺同拔火罐以及秘制药物，两个星期左右就可以医好，所以大家都叫佢哋“捉蛇专家”。晏公街上边嘅社区卫生院可医疑难杂症，可谓同“晏公”之名遥相呼应喇。
◎李月婷 媒体人
新闻推荐
展览时间：10月26日—11月16日展览地点：水墨村美术馆广州越秀区东湖路39号文化艺术中心五楼2018年9月，由艺术家郭莽园、方土...