广州嘅潮州木雕
白话广州
前两日，央视《国家宝藏》播出广东省博物馆推荐嘅“金漆木雕大神龛”，只见成个神龛高3米3，阔2米3，通体雕饰精美，金碧辉煌，好多人净系睇电视都觉得好震撼了。对于广州街坊来讲，要鉴赏实物，其实更加就脚：直接去省博3楼潮州木雕展厅就睇到啦。
潮州木雕，系岭南艺术嘅瑰宝，“中国四大木雕”之一。当然，就咁讲似乎无咩感觉，但只要你睇过，就会感受到潮州木雕“通雕”嘅奥妙。比如一只鱼虾篓，师傅可以将一旧木头雕出六七层，每一层都分别表现虾蟹、竹篾、花饰等内容，层与层之间通通透透，无论你由咩角度睇，都可以睇晒各层共同呈现嘅效果。呢种骨致玲珑，无得几十年功夫都做唔到。
正因为潮州木雕有好细致嘅表现力，油埋金漆又相当华贵，所以由明清时期开始就好闻名。作为岭南重镇嘅广州，自然亦会有好多潮州木雕嘅佳作了。就以大家熟悉嘅东方宾馆来讲，当客人行入大堂嘅时候，每每会被嗰幅17米长、两米半高嘅《清明上河图》所震撼。呢幅著名作品就系潮州木雕嘅大手笔，几十位师傅，用作一年几雕成，净系金箔都使咗8万张。
传统艺术创作，本身就系一个嘅耗时嘅过程。因此，传统艺术品特别襟睇，经得住时光嘅检验，最终，亦成为不可多得嘅文化财富。
◎梁倩薇 媒体人
新闻推荐
本报讯自12月12日起，市海洋与渔业局启动潮州市海洋环境信息预报工作，成为全省第一个发布海洋环境预报信息地级市。...